మనస్తత్వశాస్త్రం: డోనల్డ్‌ ట్రంప్‌ స్వీయఆరాధన- దుందుడుకు ధోరణి, ఓ పరిశీలన

పన్నెండు దేశాలకు చెందిన పర్యాటకులను అమెరికాకు రాకుండా ట్రంప్ ప్రభుత్వం నిషేధించింది. ఈ నిషేధాన్ని మరిన్ని దేశాలకు విస్తరించే ఆలోచనలో ఉన్నట్టు తెలుస్తోంది. ఈ మేరకు యూఎస్ విదేశాంగ శాఖ అంతర్గత నివేదికను ఉటంకిస్తూ అంతర్జాతీయ మీడియాలో కథనాలు వెలువడ్డాయి. వీటి ప్రకారం దేశ భద్రత దృష్ట్యా పర్యాటకులపై నిషేధాన్ని మరిన్ని దేశాలకు విస్తరించాలని ట్రంప్ భావిస్తున్నారు.

విదేశాంగ శాఖ నివేదికలో అమెరికా ప్రభుత్వ ఆందోళన గురించి చర్చించబడింది. కొన్ని దేశాల్లో పౌరుల గుర్తింపుకు సంబంధించిన లోపాలు ఉన్నాయని పేర్కొన్నారు. ఈ నేపథ్యంలో 36 దేశాల మీద పాక్షిక, లేదా పూర్తిస్థాయి ట్రావెల్ బ్యాన్ విధించాలని విదేశాంగ శాఖ సూచించింది.

పాస్‌పోర్ట్‌ భద్రతలో లోపాలు, వీసా గడువుకు మించి అమెరికాలో ఉంటున్న జనాలు, డిపోర్టేషన్‌కు కొన్ని దేశాలు సహకరించకపోవడం, ఉగ్రవాద కార్యకలాపాలు, యూదు వ్యతిరేక కార్యక్రమాల్లో విదేశీయులు పాలుపంచుకోవడం తదితర సమస్యలను విదేశాంగ శాఖ ప్రస్థావించింది. ఒక్కో దేశంలో ఒక్కో సమస్య ఉందని తెలిపింది.

అమెరికా చేసిన సూచనలను 60 రోజుల్లో అమలు పరచని పక్షంలో ఆయా దేశాలపై నిషేధం అమలు చేయాలని నిర్ణయించింది.

అమెరికాలో రెండవ సారి అధికారంలోకి వచ్చిన డోనాల్డ్ ట్రంప్ పదేపదే అనాలోచిత, దుందుడుకు నిర్ణయాలతో కూడిన ప్రకటనలు చేస్తున్నారు. ఆ తర్వాత “చేతులు కాలాక ఆకులు పట్టుకున్నట్టు” నిర్ణయాల విషయంలో ప్రవర్తిస్తున్నారు. తాజాగా పన్నెండు దేశాలకు చెందిన బ్యాన్‌ విషయం, ఆ నిషేధాన్ని మరిన్ని దేశాలకు విస్తరించేలా చేయాలని ట్రంప్‌ భావించడంలో మనకు ఇది తెలుస్తుంది. ఇంతకుముందు టారీఫ్‌ నిర్ణయంలో కూడా ఈ ధోరణి కనబడింది. అమెరికా లాంటి అగ్రరాజ్యానికి, ఆ దేశాధిపతికి ఇది తగదనే చెప్పాలి.

అసలు ట్రంప్‌ మానసకి స్థితి ఏంటి? ఆయన ఇలా పదేపదే ఎందుకు చేస్తుంటారని ఎవరికైనా సందేహం రావడం సహజం. ఈ నేపథ్యంలో ట్రంప్‌ను అర్ధం చేసుకునే కోణంలో ఆయన మానసిక స్థితిని పరిశీలిద్దాం.

డొనాల్ట్‌ ట్రంప్‌ మానసిక స్థితి- పరిశీలన..

1946 జూన్ 14న డొనాల్డ్ జాన్ ట్రంప్ జన్మించారు. ఆశయం, వివాదాలు, విభజన రాజకీయాలతో ట్రంప్‌ గుర్తింపు పొందారు. రియల్ ఎస్టేట్ వారసుడిగా జీవితాన్ని ప్రారంభించి, అమెరికా 45- 47వ అధ్యక్ష బాధ్యతలను స్వీకరించారు. ఈ సుదీర్ఘ ట్రంప్‌ ప్రయాణంలో ఆయన మనస్తత్వం, నాయకత్వ శైలి, నిర్ణయాలు అధ్యయనానికి ఒక ఆసక్తికర అంశంగా నిలుస్తాయి. ఈ వ్యాసం ట్రంప్ వ్యక్తిత్వం, ప్రవర్తన, నిర్ణయాలు, ఆర్థిక, వ్యాపార, రాజకీయ రంగాలలో తన ప్రభావాన్ని, అలాగే తన దూకుడు స్వభావం, మహిళల పట్ల అసభ్య ప్రవర్తన, ఇతరులను అవమానించే ధోరణిని మనస్తత్వ శాస్త్ర దృక్కోణంలో విశ్లేషిస్తుంది.

ఆశయం/స్వార్థం(నార్సిసిస్టిక్), ఆధిపత్యం/నియంత్రణ, బహిర్ముఖం/ఆవేశపరుడిగా మనస్తత్వ శాస్త్ర విశ్లేషణలు ట్రంప్ వ్యక్తిత్వాన్ని వర్ణిస్తాయి. ఇవి బిగ్‌ఫైవ్ వ్యక్తిత్వ లక్షణాలలో అధిక బహిర్ముఖత, తక్కువ సహృదయత, తక్కువ బాధ్యతా భావంతో సరిపోలుతాయి. గొప్పగా మాట్లాడటం, స్వీయ-ప్రచారం, ప్రశంసల కోసం ఆరాటం ఆయన నార్సిసిజంలో కనిపిస్తుంది. ట్రంప్‌ బంగారు బ్రాండింగ్, గొప్పలు చెప్పే భాష, తనకు , తానే “తన బుద్ధిశక్తి అసమానమని” చెప్పడం దీనికి ఉదాహరణలుగా నిలుస్తాయి.

2017లో “పర్సనాలిటీ అండ్ ఇండివిడ్యువల్ డిఫరెన్సెస్” జర్నల్‌లో ప్రచురితమైన అధ్యయనం, ట్రంప్‌ గంభీరమైన, సాధారణ భాషాశైలి 2016 రిపబ్లికన్ ప్రైమరీలో విజయానికి కారణమని చెప్పింది. ఈ శైలి, స్కంపెటీరియన్ వ్యవస్థాపక వ్యక్తిత్వం(సృజనాత్మక, పోటీ, నియమాలను ఉల్లంఘించే)తో అనుకూల వ్యక్తులను ఆకర్షించింది. కానీ ఆయన విమర్శకులకు ఆయనపై అసహ్యాన్ని కల్పించింది.

మహిళలు, మైనారిటీలు, రాజకీయ వ్యతిరేకులపై దూకుడు సంభాషణలలో ట్రంప్‌ చేసే అవమానకర వ్యాఖ్యల వల్ల తనలోని తక్కువ సహృదయత బయటకు కనిపిస్తుంది.

మహిళలపై అసభ్య వ్యాఖ్యలు, లైంగిక ఆరోపణలు, మహిళలను ఆటబొమ్మలుగా తక్కువ దృష్టితో చూడటం, ట్రంప్‌కు సానుభూతి లేని స్వభావాన్ని, “నార్సిసిస్టిక్” లక్షణాలను సూచిస్తాయి. ఎక్స్ పోస్టులు, విన్స్ గ్రీన్‌వుడ్ వంటి నిపుణుల విశ్లేషణలు, తనలో దురుద్దేశపూరిత నార్సిసిజాన్ని తెలియజేస్తాయి. అయితే గోల్డ్‌వాటర్ నియమం కారణంగా ఔపచారిక నిర్ధారణ అసాధ్యం.

ప్రవర్తన, నిర్ణయాలు..

ట్రంప్ నిర్ణయాలు ఆవేశపూరితంగా, ప్రణాళిక లేకుండా ఉంటాయి. ఇది తక్కువ బాధ్యతా భావాన్ని చూపిస్తుంది. వ్యాపారంలో ట్రంప్ కొన్ని ఘన విజయాలు సాధించినా, అనేక సార్లు వ్యాపారంలో దివాలా తీసిన సందర్భాలు కూడా ఉన్నాయి. వీటిలో ట్రంప్‌ “అతి” నమ్మకంతో కూడిన రిస్క్ టేకింగ్ స్వభావం కనబడుతుంది.

రాజకీయంగా ఇరాన్ న్యూక్లియర్ ఒప్పందం నుంచి అమెరికా వైదొలగడం, సుంకాలు విధించడం వంటి నిర్ణయాలు ఏకపక్షంగా, విభజన సిద్ధాంతంగా ఉన్నాయి. ఈ నిర్ణయాలు అతని మద్దతుదారులను ఆకర్షించినా, దీర్ఘకాలిక అమెరికా ఆర్థిక ప్రయోజనాలకు ముప్పు కలిగించే పరిణామాలు, వీటిని ట్రంప్‌ పట్టించుకోలేదు. ఆర్థిక నిపుణుల సలహాలు తనకు నచ్చవు.

చివరకు తన శ్రేయోభిలాషి ఎలాన్ మస్క్ సలహా కూడా ట్రంప్‌ వినలేదు. తనకు తానే మేధావనే అతి నమ్మకంతో ఎదుటి వారిని ట్రంప్‌ గేలి చేస్తారు. ట్రంప్‌ వ్యవహారశైలి “ఎపిసోడిక్” జీవన శైలిని ప్రతిబింబిస్తుంది. ఇది ప్రస్తుత క్షణంలో మనగలగడంపై దృష్టి పెడుతుంది. ఈ మనస్తత్వం కలిగిన వారు భవిష్యత్తులో జరగబోయే పరిణామాలను పట్టించుకోరు.

ట్రంప్ “పొలిటికల్ సైకాలజీ” అధ్యయనంలో ఆయన మద్దతుదారులలో 2016 ఎన్నికల ప్రచారం పక్షపాతాన్ని పెంచింది. ట్రంప్‌ చేసిన ట్వీట్లు, ర్యాలీ ప్రసంగాలు, “క్యాపిటల్ రచ్చ” సమయంలో హింసను ప్రేరేపించాయి. ఇది దూకుడు ఫీడ్‌బ్యాక్ లూప్‌ను సృష్టించింది. ఇది “ప్రికేరియస్ మ్యాన్‌హుడ్” భావనతో సరిపోలుతుంది. ఇక్కడ దూకుడు విధానాలను సమర్థించే వారిని ఆకర్షించేందుకు ఉపయోగపడుతుంది. ట్రంప్‌ను ఒక సూపర్ హీరోగా ఆయన చుట్టూ ఉన్న వారు ఆరాధన భావంతో ఆదరిస్తారు.

ఆర్థిక, వ్యాపార, రాజకీయ ప్రభావం..

ఆర్థికపరంగా చూసుకున్నట్లైతే, 2017 టాక్స్ కట్స్ అండ్ జాబ్స్ యాక్ట్ వంటి ట్రంప్ విధానాలు ధనవంతులకు ప్రయోజనం చేకూర్చాయి. ఇవి ట్రంప్‌లోని స్వార్థ ధోరణిని సూచిస్తాయి. చైనాతో వాణిజ్య యుద్ధాలు ఆర్థిక అస్థిరతను సృష్టించాయి. వ్యాపారంలో తన బ్రాండ్-కేంద్రీకృత విధానం విజయవంతమైనా, ట్రంప్ యూనివర్సిటీ వంటి వాటిలో మోసం ఆరోపణలు ఎదుర్కొంది. ట్రంప్‌ “ఫేక్ న్యూస్” ఆరోపణలు, సంస్థలపై అపనమ్మకం, సత్యంపై ప్రజల విశ్వాసాన్ని దెబ్బతీశాయి.

వ్యక్తిగత సంబంధాలు, నమ్మక సమస్యలు..

ట్రంప్ అపనమ్మక ధోరణి, సంస్థలు, మిత్ర దేశాలపై సందేహంగా ఉండటంలో కనిపిస్తుంది. హెల్సింకీ సమావేశంలో పుతిన్‌కు మద్దతు ఇవ్వడం దీనికి ఉదాహరణ. ఆయన దూకుడు స్వభావం, వ్యతిరేకులను అవమానించడం, ఇతరులను బెదిరించే ధోరణిని తన స్వీయ- ఇమేజ్‌ కోసం చేసే ప్రయత్నాలుగా చెప్పవచ్చు.

విమర్శనాత్మక మూల్యాంకనం..

మానసిక శాస్త్రం దృష్ట్యా ట్రంప్ వ్యక్తిత్వం “ఆత్మారాధన”తో కూడిన “అహంభావ” స్వభావం కలిగినవారని చెప్పవచ్చు. ఇది ఒక మానసిక జాడ్యం. తనను తానే అధికంగా ప్రేమించుకోవడం, కేవలం అన్ని విషయాల్లో తనకు మాత్రమే ప్రాధాన్యత ఇచ్చుకోవడం, ఇతరుల భావాలను గౌరవించకపోవడం వంటి లక్షణాలను సూచిస్తుంది. ఈ లక్షణాలు దీర్ఘకాలంగా తీవ్రమైతే మానసిక రుగ్మతగా మారుతుంది.

డోనాల్డ్ ట్రంప్‌లో “నార్సిసిస్టిక్” లక్షణాలు..
◊ “నేనే గొప్పవాడిని”, “నన్ను మించినవాడు లేడు” అనే భావన.
◊ తన శ్రేయస్సు, కీర్తి, శక్తి గురించి అపరిమిత కల్పనలు.

గాఢమైన ప్రశంసను కోరుకోవడం..
◊ ఎప్పటికప్పుడు పొగడ్తలు, అభినందనలు కావాలని తహతహలాడటం.

సహానుభూతి లోపం..
◊ ఇతరుల భావోద్వేగాలు, అవసరాలను గౌరవించకపోవడం.
◊ ఇతరుల బాధలతో తనకు సంబంధం లేదని భావించడం.

ఆత్మకేంద్రీకరణ..
◊ ఎప్పటికీ తానే ప్రాధాన్యంగా ఉండాలని కోరుకోవడం.
◊ ఇతరుల అభిప్రాయాలను పట్టించుకోకపోవడం.
◊ తన స్వప్రయోజనాల కోసం ఇతరులను వాడుకోవడం
◊ అధికారాన్ని దుర్వినియోగం చేయడం.
◊ ఇతరుల అనుభవాలు, అవసరాల్ని పక్కన పెట్టడం.
◊ ఇతరుల విజయాల్ని చూడలేని “ఈర్ష్య” కలిగి ఉండటం.
◊ ఎప్పుడూ “నాకేం లేనిది వారికి ఎందుకు?” అని ప్రశ్నించటం.

తనకు తాను ఎక్కువగా చూపించుకోవడం..

లుక్స్, డ్రెస్, సోషల్ మీడియా వేదికల్లో తనను బలంగా ప్రదర్శించుకోవడం. అన్నీ విషయాల్లో తానే సరైనవాడిని అనుకుంటూ, ఇతరుల అభిప్రాయాలను నిరాకరిస్తూ, పొగడ్తల కోసం ఏదైనా చేస్తే తనలో ఈ “నార్సిసిస్టిక్”(ఆత్మారాధన) లక్షణాలు ఉన్నాయనుకోవచ్చు. కొన్ని సందర్భాల్లో ఈ లక్షణాలు స్వల్పంగా ఉండటం సహజం. కానీ, ఇది ఇతరులను బాధించే స్థాయికి వెళ్తే, సంబంధాలు దెబ్బతినే ప్రమాదం ఉంటుంది. తీవ్రమైన ఈ “నార్సిసిస్టిక్” లక్షణాలుంటే, సైకాలజిస్ట్ సహాయం అవసరం కావచ్చు.