
ఓ ఆకుపచ్చని సన్నివేశంలో
ఆకాశం సముద్రమై ఎలుగెత్తి పిలిచింది
చెట్లు ఆవుదూడల్లా మోరలెత్తి నవ్వాయి
పచ్చిక బీళ్ళతో నేల ముసిముసిగా మురిసింది
మట్టిదారి రారమ్మంటూ చేతులు చాచింది
పొలంగట్లు పీటలై కూర్చోమన్నాయి
ఎదురొచ్చిన వానపాములు సిగ్గుపడుతూ తప్పుకున్నాయి
నీటిపాము చిన్ని కళ్ళతో అమాయకంగా చూసింది
తడిమట్టి నుండి తలెత్తి పేడపురుగొకటి పలకరించింది
ఓ పిట్ట కూతెడుతూ వేలట్టుకు ముందుకు నడిపించింది
గాలి భుజం మీద చేయేసి ఆప్యాయంగా తడిమింది
ఆకుపచ్చని నారుమడి అల్లరిగా కాళ్ళకు గిలిగింతలు పెట్టింది
ఎగురుకుంటొచ్చిన సీతాకోకచిలుక కొత్త అందాల్ని చూపించింది
రెక్కల వీణలు మీటుతూ తుమ్మెదొకటి తల చుట్టూ భ్రమణించింది
ఆకాశం నుండి దిగొచ్చిన సూరీడు చేనిమంచం మీద నడుం వాల్చాడు
ధాన్యపు కంకులకు జన్మనివ్వబోయే భూమి తృప్తిగా పులకించింది
పడమట ఉదయించే చంద్రుడు మొత్తం దృశ్యాన్ని స్వాధీనం చేసుకున్నాడు.
Discover more from The Wire Telugu
Subscribe to get the latest posts sent to your email.