పనిగంటలు

మీరు పనిగంటలు పెంచుకుంటే
నేను పొద్దు పొడవకుండా అడ్డుపడతాను
పొడిసిన పొద్దుని నా నడుముకు కట్టుకొని
సరసరా లాగి పడమటి కొండల్లో కూల్చేస్తాను

మీరు పనిగంటలు పెంచుకుంటే
మీ యంత్రాలు నా స్వేదంతో తడిసి
చెమట కంపు కొడతాయి
మిమ్మల్ని చీదరించుకుంటాయి
చిక్కులో తోసి అప్పుల్లో పెడతాయి

నాకేం లేదు నేను మేలుకుంటాను
నా మేలు కోరుకొనే వైపు చేరుకుంటాను
నా స్వేద బిందుల్ని చెరువు చేసుకుంటాను