ఇది ఏం కాలం?

ఏదో గుండెల్లో కొన్ని పిడుగులు పడ్డట్టు తోస్తున్నది.
మెరుపులు లేని ఈ శబ్దములేమిటి?
అది రానున్న వర్షానికి సంకేతమేనా!?
లేదా ఇంకెక్కడో ఇప్పటికే ఆ వర్షం మొదలైనదా!?

ముసురుకున్నవి మేఘములా?
లేక వాటి నెపమున చీకట్లా?

బతకలేక చస్తే ఆరడుగుల బొంద;
చావు రాక బతికుంటే
కడుపుకింత పిడికెడు అన్నం!

నేను కన్న పిల్లలకు,
నన్ను కన్న తల్లిదండ్రులకు
నా బాధ్యతా ఋణం తీర్చుకొనివ్వరా?

హజార్లలో పెరుగుతున్న
ద్వేషకారులు
తమ జెండాలన్నీ పక్కన పెట్టి
ఈ ఎజెండానే కసిగా
అమలుపరుస్తూ
రాలుతున్న పిట్టల సంఖ్యను
లెక్కల్లో నమోదు చేసి
తాత్కాలిక విజయంతో విర్రవీగుతున్నారు.

ఇది ఏం కాలం?
సాయంకాలం మాత్రం కాదు
ద్రోహ కాలం
హింసాత్మక కాలం

చలన శీలత ప్రకృతి లక్షణము కూడా కదా!?