బానిస వ్యాపారుల వేలం పాట అందాల పోటీ

హైదరాబాద్ నగరం ఈసారి అందాల పోటీకి వేదికగా మారింది. మహిళా సంఘాలన్నీ మూకుమ్మడిగా దీనికి వ్యతిరేకంగా నిరసనకు దిగాయి. టూరిజం నుంచి 15 కోట్లు మహిళా సాధికారిత(?) కోసం మరో 10 కోట్లు కలిపి పాతిక కోట్ల సొమ్మును ఉడతా భక్తిగా అందజేస్తామని తెలంగాణ ప్రభుత్వం ప్రకటించింది.

అంతమంది ‘అందమైన’ పడతులు కనువిందు చేస్తుంటే ఆనందించాలి కానీ ఏమిటీ ఇదంతాని “మగ కళ్ళు” అంటున్నాయి. అందాల పోటీ వల్ల ఒకరిద్దరు హీరోయిన్లు దొరక్కపోతారాని సినిమా వాళ్ళ ఆశ. అందం ఆడోళ్ళ సొంతం చక్కగా ప్రదర్శిస్తే తప్పేంటని ఉదారవాదం మెదళ్లు విసుక్కుంటున్నాయి. అస్సలు దానికెంత కష్టపడాలో ఎంత శ్రమ, ఎంత శిక్షణ అవసరమో తెలుసా? లుక్స్ లేకుండా ఎలా మనగలుగుతామని అమ్మాయిలు అంటున్నారు. ఈ మహిళా సంఘాలు ఏవో కేసులు అవి చూసుకుని మహిళా ఉద్ధరణ చేయాలి కానీ అందంపై దాడి ఏంటని మరికొందరు నిగ్గదీస్తున్నారు. మీడియా మైలేజ్ కోసం మహిళా సంఘాలు దీన్ని ఎంచుకున్నాయని కెమెరాల వెనుక మీడియా గొనుగుతున్నది. మరి మహిళా సంఘాల బాధ ఏంటి?

ఉదారవాద శరీరాలను, మనసులను ఉదారవాద ఆర్థిక విధానాలు తయారు చేస్తాయి. ఈ ఆర్థిక విధాన కాలంలో విపరీతమైన వేగంతో “అందాల పరిశ్రమ” పెరుగుతోంది. కాస్మోటిక్స్ చర్మం నుంచి గోళ్ళ వరకు శరీరంలో ప్రతి అంగాన్ని ప్రత్యేకంగాను, శరీరం మొత్తం అందంగా చూపించే లేపనాలు, రంగులు, తాత్కాలికం- శాశ్వతమైన పూతలు అన్ని కలిపి మందుల పరిశ్రమ కంటే ఈ పరిశ్రమ ముందున్నది.

శరీరంలో ఏ అవయవం అందంగా లేకున్నా అందంగా మల్చడం. శరీరం మొత్తాన్ని అంచెలంచెలుగా మార్చడం, నాజూకుగా తయారు చేయడం. శరీరంలోని కొవ్వును తీయడం కాస్మోటిక్ సర్జరీలో భాగంగా ఉంది. ప్రస్తుత రోజుల్లో ఇది వైద్య వృత్తి నిపుణత్వంలో మంచి డిమాండేడ్‌ శాఖగా ఆవిర్భవించింది. ఇక స్పాలు, బాడీ మసాజ్, బ్యూటీ పార్లర్లు, ఫ్యాషన్ డిజైన్లు, నడకతో పాటు ఎలా నవ్వాలో నేర్పే శిక్షణా తరగతులు కూడా అందుబాటులోకి వచ్చాయి. అంతేకాకుండా తిండి ఏం తినాలో, ఎంత తినాలో చెప్పే డైటీషియన్లు, పర్సనల్ ట్రైనర్లు, అందాన్ని గుర్తించే నిపుణులు, సలహా దారులు కూడా ఉన్నారు. కెమెరా వాళ్ళు, వాటి ప్రసారకులు యాడ్ ఏజెన్సీలు, సినిమా వాళ్లు చివరగా అందాల పోటీ నిర్వహణ, పరిశ్రమ, దాని జడ్జీలు, నిర్వాహకులు, వేదికలు, శరీర అందాన్ని ప్రమాణీకరించేవారు, కొలతలు వేసేవాళ్లు వగైరాతో కూడిన పెద్ద మానవ పరిశ్రమ కొనసాగుతోంది. ఇదంతా కాకుండా గత పదేళ్లలో ఈ అందపు అంటురోగంతో సామాజిక మాధ్యమం అత్యధికంగా ప్రభావితమై, లాభపడింది.

ఈ మొత్తం పితృస్వామిక కార్పొరేట్ వ్యాపారం ఈ అందాల పోటీల జబ్బును విశ్వవ్యాప్తం చేయడమే కాదు, వ్యక్తిగతం కూడా చేసి పారేశాయి. అందానికి ఆరోగ్యానికి మధ్య తేడా తెలియకుండా చేశాయి. అందంగా కనబడటమే ఆరోగ్యంగా ఉండటం అంటే, నేను అందంగా కనపడ్డాననే భావనే ఆరోగ్యం అనే దశకు యువతులను చేర్చాయి. అందం అనే ఒక మానసిక భావనను ఆత్మవిశ్వాసం, సాధికారితకు జోడించాయి. దీంతో వడపోసిన చిత్రాలు, మార్చిన ఫొటోలతో సామాజిక మాధ్యమాల్లో అందం ఏరులై పారుతున్నది.

ఇది స్త్రీలకు ఒక అత్యవసరమైన శ్రమగా మారిపోయింది. ఏదైనా నిర్ధిష్ట లక్ష్యం సాధించడం కంటే ఐదు లేదా పది కిలోల బరువు తగ్గడం ముఖ్యంగా భావించి దాని కోసం శ్రమించాలనుకుంటున్నారు. ఇంత లోతుకు ఇంకా లోతులకు అందం మీద ఆధారపడిన ఓ పెద్ద వ్యాపారం పాకుతుంది. ఇందులో వర్ణ వివక్షతా, ఖండాంతర వ్యాపారం, వలస వాదపు ఛాయలు, వలసవాదానంతరపు గుర్తింపులు, వర్గ గుర్తింపు, ఆధునికత అభద్రత వంటివి అనేకం కలిసి ఉన్నాయి.

ప్రైవేటీకరణ, సరళీకృత విధానాలు, సంక్షేమం నుంచి వెనక్కి మల్లడంతో పాటు పర్యాటకం పేరుతో తీరుబడితనాన్ని డబ్బు వెచ్చించి జీవితాన్ని అనుభవించడం అనే లక్షణాలను ఉదారవాద ఆర్థిక విధానం పరిచయం చేసింది. ఎంపికలు, వ్యవస్థాపక వ్యాపారం, పోటీ పడడం, ప్రతిభ వంటివి ఉదారవాద వ్యవస్థ లక్షణాలుగా ఉన్నాయి.

అయితే, వీటన్నింటిలో ముఖ్యమైనది వ్యక్తిగత బాధ్యత. వ్యక్తిగా నీ పైనే అన్నీ ఆధారపడతాయి. నీ ఎంపిక, నీ సామర్థ్యం, నీ నూతన ఆలోచన, నువ్వు పోటీలో నిలవడం, నువ్వు వ్యవస్థాపకులుగా మారడం. వీటిలో స్త్రీలకు మహిళా సాంస్కృతిక శ్రామికులుగా మారే అవకాశం లభిస్తుంది. అంటే ఏ వనరులు స్త్రీలకు లేనప్పుడు, అవకాశాలు కరువైనప్పుడు, నైపుణ్యాలు ఉద్యోగాలు లభించనప్పుడు ఈ వ్యవస్థ స్త్రీలకు నేర్పుతున్నది ఒక్కటే మీ శరీరమే మీ పెట్టుబడి. మీ జ్ఞానం, తెలివి, నైపుణ్యం, శ్రమ ఇవేం కాదు. ఇవన్నీ మీకు కల్పించడంలో సమాజానికి లేదా ప్రభుత్వానికి కానీ బాధ్యత లేదు.

నీ వ్యక్తిగత బాధ్యత కాబట్టి “నిన్ను నువ్వు మలుచుకో”..

వినిమయం స్వీయ రూపాంతరీకరణ అనేవి నయా ఉదారవాదంతో పెనవేసుకుపోయిన అంశాలు. ఇవి స్త్రీలకు మార్పు చెందండి మీ శరీరాన్ని చక్కగా నిర్వహించుకోండని సందేశాన్ని స్పష్టంగా అందజేస్తాయి. ఎంపిక, స్వాతంత్రం, స్వేచ్ఛ, సాధికారిత అన్ని వ్యక్తి కేంద్రమే కాబట్టి నీ శరీరాన్ని రూపాంతరీకరించుకోవడం నీదే బాధ్యత. ముందుకే చూడు, సానుకూల దృష్టి కలిగి ఉండు. విమర్శ చేయకు(అది ప్రతికూల ఆలోచన), బాధ, గాయం, అభద్రత, కోపం అన్ని ప్రతికూల లక్షణాలే అని చెప్పే లక్షల వీడియోలు, పుస్తకాలు, అధ్యాయనాలు ఈ కాలంలో వెలువడటం యాదృచ్ఛికం కాదు. కాబట్టి స్త్రీత్వం- స్త్రీల శరీరం కేంద్ర స్థానంలో ఉంటుంది. చివరికి మాతృత్వం, సేవా తత్పరతలు కూడా వేటినైతే స్త్రీల జీవితాలకు సార్ధకతగా చెబుతారో అవి కూడా పనికిరావు.

స్త్రీ శరీరం ఆమె చేసిన శ్రమతో తయారయ్యే ఒక వస్తువు, ఒక ఆస్తి, ఒక ఉత్పత్తి, ఒక బ్రాండ్. స్వేచ్ఛకు దారి తీసే ఒక రాచబాట. అదే సాధికారిత. ఈ బ్యూటీ కాంప్లెక్స్ ఫలితం బులీమియా తిండి తినకపోవడం, ఆహారం అస్తవ్యస్తం చేసుకోవడం, ఆందోళన, నిస్పృహ, రకరకాల వ్యసనాలు, (అచేషన్స్) ఒకదాన్నే పట్టుకు వేలాడడం వగైరా వగైరా. అందం ఒక ఒత్తిడి, దీని తీవ్రత బాగా పెరిగింది. ఇది స్వీయ మానసికతకు దారితీసింది. రకరకాలుగా కొత్త సాంకేతికతల వినియోగం దీనికి బాగా ఊతమిస్తుంది. “ఈ దుందుడుకు వినిమయ పెట్టుబడి దూకుడుగా స్త్రీల శరీరాలతో వలసలు ఏర్పాటు చేసుకుంటున్నది” దీని కొత్త లక్షణాలు విస్తరణను పరిశీలిద్దాం.

అందంగా ఉండాలనే ఒత్తిడి లేని అనేక సమయాలు, సందర్భాలు స్త్రీల జీవితాల్లో అనేకం ఉండేవి. ఇప్పుడు వాటిని కూడా ఈ అందం వ్యాపారం ఆక్రమించింది. పుట్టుక, పసితనం, బాల్యం, ఆటలు ఆడటం, నిద్రపోవటంతో సహా కాలాన్ని దేన్ని కూడా ఇది వదలటం లేదు. జీవితంలో ప్రతి దశలో ప్రతి ఒక్క స్థితిలో అందంగా కనపడే తీరాలి. “ఎప్పుడు త్వరపడినట్టు కాదు, ఎప్పుడు ప్రారంభించిన ఆలస్యం కాదు” ఇది ఒక చర్మం రంగుని మెరుగుపరిచే పూత పసిపిల్లలకు వాడొచ్చా( దానిలో పాదరసం ఉంటుంది) అని అడిగిన దానికి జవాబు అంటే పసితనపు లేత చర్మానికి ఈ రసాయనాలు హానికరం అయినవైనా పూసేయండి అందంగా ఉండాలి కదా అని అర్థం. వయస్సు మీరుతున్నదని ఆందోళన, ముడతల గురించిన ఆవేదన వీటన్నింటిని సృష్టించేది వీటికి పరిష్కారం ఇచ్చేది కూడా అందాల పరిశ్రమే.

ఇంట్లో ఉంటున్న తల్లి కూడా నిరంతరం అందంగా కనపడేలా తన్ను తాను తీర్చిదిద్దుకోవాలి. బిడ్డకు పాలిచ్చిన, లేకున్నా గర్భవతి కాక పూర్వం ఉన్న స్థితికి శరీరాన్ని తీసుకురావడానికి ఆ తల్లి శ్రమ పడాలి. అంతదాకా అందపు ఒత్తిడి చొచ్చుకుపోయింది.

శరీరంలో ఏ అంగాలు అందంగా ఉండాలి. మొహం, కాళ్లు, చేతులు వగైరా అయిపోయాయి. 1990 దశకంలో నాజూకుగా ఉండాల్సింది మోచేతి పైన జబ్బలు. 2000 సంవత్సరం తర్వాత చంకలు అవి నల్లగా ఉండకూడదు. తర్వాత కనుబొమ్మలు, ప్రస్తుతం రెండు తొడల మధ్య ఉండాల్సిన దూరం(నిలబడితే స్త్రీ తొడల మధ్య రెండు అంగుళాల నుంచి మూడు అంగుళాల దూరం కనపడాలని, అవి నాజూకు తొడలు- కాళ్లకు నిదర్శనమని ఇటీవలే ప్రామాణీకరించారు). దీంతోపాటు బికిని వారధి, స్థనాల కింది భాగం అందము, తొడలపై కింది మందం వగైరాలు ఈ జాబితాలో చేరాయి. కాబట్టి స్త్రీల శరీరాలు అందంగా ఉండి తీరాల్సిన భాగాల అన్వేషణ వాటిని అందంగా చేసుకోవాలనే ఒత్తిడి నిరంతరాయంగా కొనసాగుతుంది.

శరీరం పైనే అందం పరిశ్రమ ఆగిపోతుందనే భ్రమలు అవసరం లేదు. శరీరం లోపలికి కూడా దూరిపోయింది. బ్యూటీ డ్రింక్స్ ఏవేవి కలిపి తాగితే అందం పెరుగుతుంది. ఏది తాగితే, తింటే ఏ భాగం అందంగా మెరుగుపడుతుంది. విటమిన్లు, ఖనిజాలు వాటికి ట్యాబ్లెట్లు అందాన్ని జారిపోకుండా, పాడైపోకుండా నిలబెట్టే నిరోధక వ్యవస్థలు వగైరాలతో వీటిపై పరిశోధన ట్యాబ్లెట్లు, టానిక్లు, డ్రింకులతో కూడి మొత్తం ఇది ఒక ప్రత్యేక పరిశ్రమగా నిలుస్తోంది.

ఇక మరొకటి అందానికి సలహాలు, చిట్కాలు వగైరాలతో ప్రకటనలు. అందానికి సంబంధించిన మొబైల్ యాప్లతో పాటు “నీవే చేసుకోవచ్చు, ప్రయత్నించి చూడు” ఇంట్లోనే నీ దగ్గర ఉన్న వాటితోనే అంటూ రకరకాల వెబ్సైట్లు సలహాలు సూచనలు ఇస్తుంటాయి.

నీ గోరు విరిగిందా? పెట్టుడు కనురెప్పను సరి చేయటానికి సమయం లేదా? ఇదిగో ఇలా తేలిగ్గా తొందరగా చిటికలో చేసుకో వంటి ప్రకటనలు. ఎవరిని అడగకుండా, ఎవరికి తెలియకుండా అందంగా మారిపో అంటే అందం తెచ్చుకోవడానికి బ్యూటీ సెంటర్ అవసరం లేకుండా కాలు బయట పెట్టకుండా ఉండే ప్రక్రియలు- చికిత్సలు అన్నింటిలోకి వచ్చేశాయి. తీరికలేని బాధ్యత కలిగిన తన సామర్థ్యాన్ని పరాకాష్టకు చేర్చుకునే స్త్రీ ఉదారవాద వ్యవస్థ సృష్టించిన అందానికి ప్రతీకగా మారింది. పై వాటన్నింటికీ ఆధారం అందం.

కొనసాగింపు- అందం.. స్థిరీకరణ – అందం..

అందం భావన వ్యాపిస్తుంది. విస్తరిస్తున్నది అన్ని ప్రదేశాలు అన్ని సమయాలకు అన్ని అంగాలకూ. అన్ని రకాల కార్యక్రమాల్లో రూపాల్లో విభాగాల్లో ఇది అది అని తేడా లేకుండా స్త్రీ శరీరంపై నిఘా అనేది ఎక్కువ సమయం ఆక్రమించే అంశం.

చిత్రీకరణ వ్యాపార ప్రపంచపు నిఘాకు అవసరమైన ఛాయా చిత్రాలు తీసేటప్పుడు కూడా స్త్రీ శరీరాన్ని అణువణువు కవర్‌ చేస్తూ , శరీరంలో ఎక్కడ ఒక్క మడత కానీ నల్లని గీతలు కానీ(ట్యానింగ్‌) కూడా కనబడని స్థాయిలో జాగ్రత్తలు తీసుకుంటున్నారు. ఈ క్రమంలో స్త్రీల శరీరంలో అంగాంగాన్ని సూక్ష్మ స్థాయిలో నిఘా వేసి మరి చూస్తున్నారు. ఆధునిక కెమెరాల స్థాయికి తగినట్లుగా మనల్ని మనం కూడా హెచ్‌డీ మెరుపులకు సరిపడేలా తీర్చిదిద్దుకోవాల్సి వస్తుంది. దీనికి తోడు స్త్రీలు తమను తాము సెల్ఫీలు, ఫోటోలు తీసుకుంటూ సామాజిక మాధ్యమాల్లో అప్లోడ్ చేస్తూ లైక్‌ల కోసం ఎదురుచూస్తూ తమపై తామే సామాజిక నిఘాకు తలుపులు తీస్తున్నారు. ఇంత సూక్ష్మ పరిశీలన నేత్రం. మైక్రోస్కోప్‌తో జరిగినంత వివరంగా స్త్రీల శరీరాలపై జరుగుతుంది. కరోనా వైరస్‌పై కూడా ఇంత జరిగి ఉండక పోవచ్చు.

ఒక స్త్రీ మరొక స్త్రీపై చేసే పరిశీలన ఎలా ఉందంటే ఏం ధరించింది, మేకప్‌ ఎలా వేసుకుంది, ఏ ఏ దుస్తులు వేసుకుందిలాంటి వాటిని ఒక్క క్షణంలో తేరిపార చూసేసి నిర్ధారించి అంచనా వేసే ఒక దృష్టిని ఈనాటి తరానికి అందాల పరిశ్రమ నేర్పిస్తుంది. “ఎట్లా చూడాలి”, “ఏం చూడాలి” అనేది గత తరం స్త్రీలకు నేటి యువతకు ఒక వ్యాపారం కల్పించిన తేడా ఈ దృష్టి కోణం.

ఒక కొత్త నువ్వు, నేను..

నేనెంత అందంగా, వెర్రెక్కించేలా ఉన్నాను?
ఎంత వయసులా కనపడుతున్నాను?
ఇదే యావ, రోజుకు పది సార్లు సెల్ఫీలు. సర్దుకోవడాలు పోల్చుకోవడాలు ఇదే వ్యాపకం. అందమైన పెదాలకు పది చిట్కాలు నేర్చుకోవడం అదే నైపుణ్యం. అందపు యాప్‌లు ఏ దశ వరకు పెరిగాయంటే స్త్రీల శరీరం, మొహం అనేది సంక్షోభ వినిమయ కేంద్రాలుగా మారిపోయాయి.

ఈ పరిధులకు ఈ ఒత్తిడీలకు కొలమానాలకు బయట ఉండే స్త్రీలకు అవకాశం లేక కావచ్చు, కావాలని ఎంపిక చేసుకునేవే కావచ్చు. వారు ఈ కొత్త సానుకూల అందాల లోకం నుంచి బహిష్కృతులు తిరస్కృతులు. ఎట్లా కనబడాలో అదే సర్వస్వంగా మారిపోయిన చోట దీనిలో భాగం కాని స్త్రీలు శ్రామికులు ఉద్యోగులు, గృహిణిలు వీళ్లంతా వెలివేయబడతారా? కాదు వారు జాలికి పాత్రులు లేదా తిరుగుబాటు దారులు.

1990ల తర్వాత స్త్రీలు మరింతగా అన్ని రంగాల్లోకి చొచ్చుకు వచ్చారు. నైపుణ్యం, సామర్ధ్యం, శ్రమ కలుపుకొని వేగంగా నిచ్చెనమెట్లు ఎక్కారు. రాజకీయ రంగంతో సహా అన్నింటిలో పురుషాధిక్యతకు సవాలు విసిరారు. దీన్ని ఆధిక్యం సహిస్తుందా? దీన్ని మొరటుగా అణచివేయటం సాధ్యం కాదు. నాజూకుగా ఉదారంగా ఈ శరీరాన్ని ప్రబంధ కాలంలాగా అందంతో ప్రామాణీకరించి దాన్ని విజయాలకు ప్రతీకలుగా మార్చివేస్తే అటు అనేక వ్యాపారాలు ఇటు స్త్రీల అత్యాధునిక బానిసత్వం దాని దోపిడి ఒకే ఐటీ దెబ్బకు అనేక పిట్టలు అదీ నేటి కార్పోరేట్ వ్యాపార విజయ రహస్యం.

ఇది స్త్రీల శక్తి సామర్థ్యాన్ని అందం కింద సమాధి చేసింది. స్త్రీల జ్ఞానపిపాసను కాలరాసింది. వారి అనుభవాలని తృణీకరించి వారి అభిమానాన్ని తొక్కి వేసింది. వారి శ్రమను, వారి ఉత్పత్తి సామర్ధ్యాన్ని, వారి ప్రత్యుత్పత్తిని అవహేళన చేసింది. కించపరిచింది. వారి ప్రపంచాలకు పరిధులని నిర్ణయించింది. వారి స్వేచ్ఛ స్వాతంత్రాల్లో కనపడని విషం పోసింది. తాము చమటోడ్చి సాధించిన విజయాల వెనుక అందంగా ఉన్నానా? అనే అనుమాన భూతం పెట్టింది. వారి నరాల్లో ఒక స్వీయ విద్వేషం, వయస్సు పట్ల భయం నియంత్రణ కోల్పోతామనే ఆందోళన నింపింది.

స్త్రీల సమానత్వ గౌరవ పోరాటంపై ప్రతి దాడి అందాల పరిశ్రమ. స్త్రీలంటే శరీరం కాదన్న నినాదాన్ని తిరగరాసి స్త్రీలు అంటే శరీరం మాత్రమే అని ప్రకటించింది . ఈ అందం ఒక మతం, ఒక క్రతువు, ఒక సాంప్రదాయం, ఒక వినూత్నమైన రూపంలో దాడి చేస్తున్న అతి పాత కొలమానం.

ఈ వినిమయంగా మారిపోయిన అందం లైంగికతపై దాడి, శరీరంపై పునరుత్పత్తిపై హక్కు పొందిన స్త్రీలను వారి శరీరాలపై హక్కు వారే వదులుకునేలా చేసిన ఒక కుట్ర. వారి కదలికలు, వారి నడక, వారి భంగిమ, వారి పలుకు అన్నింటిపై ఈ అందాల పరిశ్రమ నియంత్రణ సాధించింది. అందాల పరిశ్రమ తయారు చేసే కృత్రిమ అందం తప్ప స్త్రీలకు వేరే గుర్తింపు లేకుండా చేసింది.

ఈ అందం సార్వజనీనమైందిగా అందరూ వాంఛించేదిగా సృష్టించింది. స్త్రీలు అందాన్ని కోరుకుంటారు. పురుషులు అందమైన స్త్రీలను కోరుకుంటారు. స్త్రీలు తమ అందాన్ని మెరుగుపరుచుకునే శ్రమలో ఉంటారు. పురుషులు పరిశ్రమలు పెట్టి డబ్బు సంపాదించింది, అందమైన స్త్రీలను పొంది, వారిని తమ విజయ చిహ్నాలుగా ప్రదర్శించుకుంటారు. భాష ఏదైనా రూపం అత్యాధునికమైన అందాల పోటీల సారాంశం ఇదే.

స్త్రీ అందం పురుష ప్రపంచంలో ఒక మారకద్రవ్యం(కరెన్సీ). ఈ అందం అనేదాన్ని కరెన్సీగా వాడటం పారిశ్రామిక విప్లవంతో ప్రారంభమై నేటి కార్పోరేట్ కాలానికి పతాక స్థాయికి చేరింది. ఈ అందం అనే భ్రమ కేవలం లైంగిక దోపిడీకి, శారీరక దోపిడీకి సంబంధించిన అంశం కాదు. అది ఒక రాజకీయ భావజాలం. స్త్రీలు పైపైకి ఎదుగుతున్న కొద్ది వారిని తక్కువ చేసేందుకు పితృస్వామ్యం ఏర్పాటు చేసిన కుల చర్చ అందం.

అందాన్ని సామర్ధ్యానికి, తెలివికి, కొలమానంగా విజయవకాశాలకు పునాదిగా భావిస్తే దాన్ని ప్రామాణీకరిస్తే ఈ రక్షణ రేఖకు బయట ఉన్న అసంఖ్యాకమైన స్త్రీలు ఎంత అవమానానికి ఎంత తిరస్కారానికి ఎంత దోపిడీకి గురవుతారు? మొత్తం సేవా రంగంలో రిసెప్షనిస్టుల దగ్గర నుంచి ఎయిర్ హెూస్టన్‌ల వరకు అందం ఇప్పటికీ ఒక అవసరంగా మారిపోయింది. అందంగా ఉన్న వాళ్లే బాగా చదువుకుంటారనే సామెత కూడా పాతదే కొనసాగుతున్నది. “బ్యూటీ విత్ బ్రెయిన్స్” అందాల పోటీలెంత ప్రకటించిన దానిలో ప్రశ్నలు బుర్ర తక్కువ ప్రశ్నలే.

సామర్థ్యమున్న స్త్రీలు, శాస్త్రవేత్తలు, వ్యవసాయదారులు, నిపుణులైన శ్రామికులు ఉత్పాదక శ్రమల్లో అనుత్పాదక శ్రమల్లో తీరికలేని వాళ్లు “అందం” దెబ్బకి ఆత్మన్యూనతకూ తిరస్కారాలకు గురవ్వాలా?

అసలు అందానికి ఒక నిర్వచనం ఒక ప్రమాణం ఉందా? ఉంటుందా? అది సాధ్యమేనా! తెలుపే అందమా? అంటే వాళ్ల వ్యాపారం యూరప్‌లో ఉంటే తెలుపు అందం. ఆఫ్రికాలో ఉంటే నల్లటి చర్మపు మెరుపందం అంటారు. రకరకాల శరీరపు రంగులు, అవయవాల పొందికలు, శరీర నిర్మాణ చక్రాలు ముక్కు, మొహం అమరికలు గల ప్రపంచంలో అందానికి పోటీలు అంటే అందాన్ని ఒక రకం అవయవాల కొలతలకు అమరికలకు పరిమితం చేయటమే. “ప్రపంచ సుందరి” ఉండటం ఎట్లా సాధ్యం అసలు?

నిపుణత్వానికి, జ్ఞానానికి, సహజ శరీర నిర్మాణాలకు, వాటి ఎదుగుదలకు, భిన్న ముఖ కవళికలకు, అంగాల అమరికలకు గల బహుళత్వాలకు ఇది అణచివేత స్త్రీల సమానత్వ భావనను దానిపై సాగే పోరాటాన్ని పక్క దారి పట్టించడం. స్త్రీలను విజ్ఞానులుగా, నిపుణులుగా, ఆటగాళ్లుగా తయారు కానీయకుండా దారి మళ్లించి శరీరాలుగా మార్చడం. వారి మేధస్సును వికసించనీయకుండా ఆపడం ఇది వ్యాపారం కాదు .ఇది అవకాశం కాదు. ఇది మానసిక శారీరక బానిసత్వం. అది “ప్రపంచ సుందరి” వేదిక కాదు. స్త్రీల శరీరాలను కర్రలతో పొడిచే దాని బిగుతును సొగసును వేలం వేసే బానిస వ్యాపారుల కబేలా. ఈ బానిస వ్యాపారాన్ని ప్రపంచం అంతా ఛీత్కరించాలి. ఈ మానవ మాంసపు అశ్లీల అమ్మకాలనీ తిరస్కరించాలి.