లేజర్ కాంతిపుంజం..

అజ్ఞాన తిమిరం నిండిన
మది తరగతి గదిలో
జ్ఞాన నిధి వెలుగుల
పాలపుంత గురువు

అపజయాల బ్లాక్ బోర్డుపై
నిరాశ నిస్పృహల
రాతలను చెరిపేసే
ప్రేరణ దారి దీప గెలుపు
తారా లోకం గురువు

బతుకు శాంతి పాఠాలతో
జీవన మానవత్వపు
గుణపాఠాలను రంగరించి
కలల ఫిజిక్స్ శోధనలో
విజ్ఞానతత్వ తరంగిణి
మైక్రోచిప్ గురువు

తన ఆలోచనల రాకెట్
అడుగుజాడలను స్ఫూర్తి
శిఖరాలుగా మార్చే
భవిష్యత్ కాలపు గుండెలో
లేజర్ కాంతి పుంజం గురువు

జీవిత గణిత గమనానికి
సాంకేతికత రంగులనద్దే
నిత్య గీతా సారాంశ బోధకుడు
సమాజాభ్యుదయాన
అభినవ ఆచార్య సూర్యుడు
గురువంటే మహా చైతన్యపు
విలువల కవిత్వం
గురువంటే అనంత శూన్యంలో
అంతరిక్ష అక్షర విశ్వం